Aldleahy - - Twitter

السفط في ماهو ولا شي لي شي
سياسة التطنيش هي لي سـياسه
احط بعض الناس ميّت وهو حي
قدره ولا حتى صفر في مقاسه

الناس فيهم طبع دايم في بعضهم ياكلون
مايسلم مْن الحي ناسٍ في سراديب القبور
حتى على الواتساب قاموا بالعيون يراقبون
يراقبون اول دخولك عندهم واخر ظهور

تدري وش اللي بالزمن يعتبر درس
درسٍ ماغيره في جميع المدارس
لامن غرست وماطلع للوفاء غرس
في من تحسبه للمواجيب فارس

للضغط والسكر وكتمات الانفاس
وصفة علاج ان خذتها مايجنّك
احتاط في فن التعامل مع الناس
بالـذوق و الأخـلاق يمتـاز فـنّك

ياليتني ياطير مثلك ليْاضقت
اصعد فضاء ماني على الارض مكتوف
امر فوق ديار ريمه ليا اشتقت
واطلق نظر عيني على البيت واشوف

اخذت اعادة راي مع وجهة نظر
في حال من وصله ليّا عاهد يبور
سويت له في قائمة قلبي حظر
لامتصل ولابقاه اخر ظهور

حاله جديده مْلاحظها ولي فتره
واشوفها بين مقبوله ومرفوضه
مع لابس الثوب واللي لابس الغتره
في كل عام جديد التهنئه موضه
والشي لاصار بدعه واجبٍ بتره
واللي ماهو في كتاب الله يجي فوضه

يفـخر الإعـلام فـي مثل الكحيله
صححت وضع النساء في تجربتها
كل ماسـوت عمـل تعـطي دليله
مـبـدعـه متمـكنه فـي تغـطــيــتـها
كل صوره تلتقـط تـطلــع جميله
فن لامن صوّرتْ في كـــامِيرتها

ياحمود عــزالله انجلّطوا
المــدعـو فْـــلان واصـحـابه
غلّطـوا ولاكـنهم غلّـطوا
اشكالهم مااحسب حسابه
خلطهم زين وانخلّطوا
وحـطـيـتهـم تـحـت سـبـابه
تمددوا خوف وانبلطوا
واستسلموا جمـلة عـصابه

ينتهي توقيت الاخلاص من عشْرّة نـذل
ماتواليها حسايف معه لو تنتهي
يدعي في بذل والوقت يكشف من بذل
في مسارٍ حدد المنتبه والمنتهي
من عذلني في فْراقه ياليته ماعذل
عايفه قلبي ونفسي على ماتشتهي

ملامحك ترجمتها نظرة عيونك
فيك الغضب لو تخفى فاضحٍ سره
خل الزعل وابتسم والعيد من دونك
مافيه من عالم الافراح لو ذره

عندما تكون وسيط يجب ان تكون ناقلاً محايد بالمهمة بين الطرفين وليس ممثلاً لأحد الأطراف

ماتجتمع (عين) معها (حاء) في كلمه
في كلمةٍ واحدة مَحدٍ يركبها
يقولها شاعرٍ فن اللغه علمه
والارض يمشيبها يفهم مناكبها

في كل نهضه فيه تطوير وانجاز
واللي يعافر مجد سابق تعوفر
كلٍ يتابع منتخب مبدع وفاز
وحنا نتابع منتـخب حـظٍ اوفـر

اللي يضيف الناس ثم يْحذفهم
قولوا له انك صرت واضح ومكشوف
موجود برنامج يعلم قذفهم
واللي يضيف ويحذف الناس محذوف