.:$:.][راح من ضيق الحياة لرحمة الله الفضية][.:$:.

[align=center]بسم الله الرحمن الرحيم
((إن القلب ليحزن .. وإن العين لتدمع))
بقلوب رضيت بقدر الله .. نعبر عن شعورنا بأقلامنا .. بعد فقد من لو فقدته العيون لم تنساه القلوب
هذه مرثيتي في فقيد الأمة الملك الخادم للحرمين الشريفين فهد بن عبد العزيز آل سعود رحمه الله
نسأل الله العلي العظيم أن يغفر له ويرحمه ويجعل قبره روضة من رياض الجنة وينير له طريقه إلى جنات النعيم بإذن الله[/align]

[align=center][/align]
[poet font="Simplified Arabic,5,darkred,bold,normal" bkcolor="transparent" bkimage="backgrounds/16.gif" border="none,4,gray" type=2 line=200% align=center use=ex length=0 char="" num="0,black" filter=""]
لو فرحنا لخير ربي ما جزعنا من الرزية = عادة المسلم صبور وجلد فالشدة المريرة
قبل يومين نتباشر في شفاء جزل العطية = كل واحد ترسم البسمة شفاه المستديرة
مير جانا العلم فجأة يوم وافته المنية = وأعلن الديوان نعيه خير قائد للمسيرة
وأعلنوها فالأثير وشوش الرادو عليه = وقامت الموجة الطويلة تخلط الموجة القصيرة
والفضائيات تنقل والخبر ما هو شوية = كل دقيقة تعلن الحرة وفاته والجزيرة
ما ذبح وجه النهار إلا مضاريب العشية = والحزن بعد البشاير ما رحم ضحكة بشيرة
الله أكبر والقدر ما زعل النفس الرضية = مير حزن القلب حق ودمعة العينين غيرة
والمليك اللي خذاه الموت تبكيه البرية = ما تشوف إلا دموع عيون أهل شبه الجزيرة
من حقل لين الحديثة لمنفذ الخفجي سوية = لين سلوى لين خرخير الجنوبي والسعيرة
لين كل الساحل الغربي تدن الهاشمية = ما جداه إلا تهل دموع فرقاه الغزيرة
وتبكي الصمان والحرة مع طويق وطمية = والسراة أسقى النفود بدمع سلمى والنجيرة
سيل الشعبان دمع البين بعيون شقية = من حدود المملكة للعود سوت له جريره
أربع وعشرين عام تبذل كفوفه ندية = يخدم البيتين فيها من شعيرة في شعيرة
فالسياسة حط للشعب السعودي قابلية = وحط فالعالم مكانة للسعودية كبيرة
لين صرنا مرجع الإسلام في أية قضية = والعروبة كل أبوها فالمواقف تستشيره
عاقل فاهم محنك صلب حازم فالبلية = عالم مدرك مفكر معتدل ينضح عبيره
عاش عمره في بساطه والتواضع له سجية = جامع هيبة ملوك بعفة النفس الفقيرة
متبع أكبر وصية وراح وأعطاها وصية = شرعنا القرآن والسنة وسيف الله بجفيرة
غسلوه وكفنوه بمنهج السنة الزكية = لا مسيرة ولا علم ينزل ولا نظرة أخيرة
راح من ضيق الحياة لرحمة الله الفضية = مسلم ما يملك إلا عفو علام السريرة
يالله انك ترحمه رحمة تجاوز كل خطية = وتسكنه في جنة الفردوس وتنور مسيرة
وأشهد انه ما يعزينا بعده إلا سمية = خادم البيتين أبو متعب وأبو خالد وغيره
الملك عبد الله ابن سعود وأنا من الرعية = بيعة يشهد عليها الله ما عندي خشيرة
وكل شخص ما يبايع مات موت الجاهلية = يالله إنا نستعيذك من جهل عمي البصيرة
[/poet]

[align=center]إبنه الشاعر/ ندا بن أحمد الشمري (حفر الباطن)[/align]

[align=center][/align]