بيت القصيــد

أحبتي الغالين

السلام عليكم ورحمة الله وبركاته

لعيونكم الغالية
( بيت القصيـد )

[poem=font="Simplified Arabic,6,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
يامتعب الشعار يابيت القصيد=لولا تعبهم فيك ماجالك طراه
كم لي وانا ادور على معنى جديد=ماكل من دور على الطيب لقاه
لو كل من يحذف حصاه يجيب صيد=ماكان نحتاج البنادق والرماه
ولو ينصرف في البنك شيك بلا رصيد=كلٍ طمع في الدر الأصلي وإشتراه
لعيون من يبحث عن الدر الفريد=هذي وصاه لمن يحفظون الوصاه
يمكن ليا نصبت موازين العبيد=ترجح بميزاني ويكتَب لي نجاه
ايامنا ماكلها فرحه وعيد=وإن عشت يومك ماضمنت اللي وراه
والرجل مهما عاش في الدنيا سعيد=لابد مايحتاج ربعه واقرباه
لاتقطع ارحامك ويشملك الوعيد=ولاتخسر الغالي ولاترخص غلاه
واخوك لا تخسره لو إنه عنيد=يخطي مية مره وتسمح له خطاه
وإن كان شد الحبل حاول ماتزيد=ارخيه قبل الشد يوصل منتهاه
ولا تنصحه وقت الزعل مايستفيد=واعرض عليه النصح في ساعة رضاه
وليا طلب رايك عطه رايٍ سديد=وإن ماطلبك الراي لاتبحث خفاه
واعرف ترى قرب المنازل مايفيد=واحيان يبدي شي ماودك تراه
لكن لاتقرب ولا تنزل بعيد=خلك على قول المثل حذفة حصاه
واحفظ حبال الود حفظك للوريد=اللي معلق فيه موتك والحياه
ترى الأخو مهما حصل يبقى عضيد=وترى عيال العم ماعنهم غناه
الناس دايم ماتهاب اللي وحيد=اللي ليامنه وقف محدٍ معاه
لو كان في الميقاف عزمه من حديد=لابد بعض احيان ينزل مستواه
وخذ الحذر لو كنت في قصرٍ مشيد=الذيب لولا فطنته كلٍ رماه
لاتامن الدنيا لها مكرٍ وكيد=يمكن تحدك صوب شخصٍ ماتباه
إليا رمتك بوجه شيطانٍ مريد=طاغي ومتمسك بقانون الطغاه
ثبت عليه شهود والخالق شهيد=لا تندفع للشر وتسوي كماه
وإتبع دروب الحق عنها لاتحيد=ويبين راعي العرف من راعي العياه
ولاتبدي اسرارك لزيد ولا عبيد=من يحسدون الرجل في زاده وماه
لاجوك قول الله يدبر مايريد=ولاتعرض الدعوة على غير القضاه
إلا على شيخٍ وله عقلٍ رشيد=وإلا على مطنوخ له منصب وجاه[/poem]

لا فض فوك


اخي الغالي عبدالله


صح الله لسانك


درر وروائع شعرية تسجل بماء الذهب


بيض الله وجهك


النصائح كانت في الماضي تشترى اليوم عزك من يدور لها

وانت هنا تركت بصمه رائعه في تلك الحلقة الرائعه


تقبل تحياتي

اخوك

ابونايف

مـــــدرســـــــــــة
ماشاء الله تبارك الله


من المحرومين

رجلٍ يمر هنا ويطلع ما إستفاد شي ..

بيض الله وجهك وصح لسانك

الاخ الغالي عبدالله الطلحي
بيض الله وجهك
وعز الله انك تستاهل لقب شاعر الحكمه
علي بالطلااااق انها كفو وانت كفو

تقبل مروري ومهما اقوووول انت فوق الاشاده ومدحي فيك اقل من مستواك

تقبل مروري

الله الله يابوناصر ما اجمل ماتكتب
صح لسانك على هذا المتصفح الغني بالشعر ياعبدالله

هلا بالزميل والصديق والشاعر الجزل
الله يبيض وجهك على هذا التواصل
الذي أنا أعترف بتقصيري فيه