Tweet
حمد السحيمي
نويت أهجم على شايع ولد فارس وأخوه سعيد
ولاعندي لهم فـي ماقفـي رحمـه وماويـه
بنينا البيت من صم الحجر والحيد فوق الحيد
بعد مازان مبنـى البيـت هـدوه الحراميـه
شايع العيافي
ليامنك هجمت وجبت يوم مثل يوم العيد
لابد انك تبي تاخذ من الأثنين عيديه
بلشنا بالعباد اللي توسوس والبعيد بعيد
جنابينا تقص العظم والرايه سعوديه
حمد السحيمي
انا مانيب اضيع صيدتي لازان مرمى الصيد
والا مني كويتك يالعيافـي تونـس الكيـه
انا ماقول فيك قصور ياعنتر ويابـو زيـد
لاكن اني نويت اكشف علومـك للنداويـه
شايع العيافي
تقوله وانت تنقص كل ليله والعباد تزيد
ولا نسمع لك الا نبرةٍ بين الحساويه
محاجينا حصينه وانت قرر ماتشاء وتريد
وش نسوي معك لاصار في صدرك حساسيه
حمد السحيمي
الا ياطير ياطير الفلس والفيد ما من فيد
غذيتك واثرك اللي يوم اهده يخلف النيه
توقع ياولد فارس مادامك شاعر صنديد
قبل لومي عليك بحربـة والا بجنبيـه
شايع العيافي
دعاك ابليس وانت انقدت له من دون شرط وقيد
وانا لو امسكه حطيت في علباه ماريه
ليال البرد تبغى ضو سمر وركوةٍ من حيد
يفوح القدر وتدسم شواربها الشقرديه
حمد السحيمي
تمدح لو على راسك ياشايع يرقص العربيد
وانا ماني من اللي يخلط الحسنات بالسيـه
سواليف البدو مازادها الا كثـرة الترديـد
الا واشيب عين البـدو لاهبـت شماليـه
شايع العيافي
انا لو انشدك عن ماضي الدنيا تقول جحيد
لكن ابشر براس الظبي وقرون النعيميه
لا تاخذك الظنون الكاذبه في مركز التجنيد
ترا سوره تشوف وانت في بر النعيريه
حمد السحيمي
مادام انك تنشد يارفيقي لاتـروح بعيـد
تعبت وحفيت اقدامي من الروحات والجيه
تهدد باليمين اللي مضريها على التسديـد
تقوله والحبل معقود ليه مـن ورى ليـه
شايع العيافي
انا حاضر هنا والله يدبر مايشاء ويريد
لكن المشكله غلطة حمد ماهيب عفويه
ليا منا تعزوينا طرحنا الفارس الرعديد
وفارسنا ماهو تخريج مضمار الفروسيه
تعليق