من الوجد .. }{~ ابن لعبون ~}{

السلام عليكم
هالقصيده هذي لبن لعبون .. من احر قصايده بالعاطفه .. توجد على حبيبته هيله الي كان يرمز لها بمي .. واستنطق الطقاقه فريجه وحاور الحمام .. وصرح باسم حبيبته فيها .. من عقب ما زوجوها اهلها لثاني مره بعد وفاة زوجها شيخ المنتفق .. من رجل وضيع من اهل منطقه تسمى ديلم

استلمو القصيده :

قالت فريجه وهي من يوم ** يطري لها الفن وتشيله (1)

حمام ياللي يدير الحوم ** من فوق نبنوبٍ ظليله

اشوف تطرب بنوحك دوم ** وتقول واحب قلبي له

قصيدةٍ قافها معلوم ** بالله يالورق من هي له (2)

يالورق وش لك بطرق اللوم ** وفنون ذا الغي وش هي له

ان كان صيدك تريد النوم ** ما فيه يالورق من حيله

ماشفته امسٍ تشوف اليوم ** والله يعينك على الليله

وتذوق ما ذقت يالمشيوم ** بفراق خلي وفقدي له

يغشاك دونه لميع نجوم ** والبرق من بعد يوضي له (3)

غروٍ نطحني يجر هدوم ** يجلى صدا القلب شوفي له

يلوح للغي فيه رسوم ** والزين والملح خلي له

ياليت من ضاجعه بالنوم ** واستر به لو طرف ليله

سفاح دمعي عليه ركوم ** مثل السحايب هماليله

دلاله ارخص عليه السوم ** من عقب ما هو بمغلي له (4)

والقيل والقال هو واللوم ** يعداك والعيب يا هيله

ان جاك مثلي كثير هموم ** يلوم حظه فقولي له :

كم اخل الحبس من مظلوم ** وما جاك من وادي سيله

من عقب شيخ العرب والروم ** مغني المفاليس من نيله

زين المجلى حجا المضيوم ** يوم المداريع تتلي له (5)

وانتي على هودجٍ مزموم ** ومن الغوالي جهاجيله (6)

كم خادمٍ لك وهو مخدوم ** يتلي ضعونه ويتلي له

واليوم صارت خيال حلوم ** والعز طفيت قناديله

عقب الفهد تاخذ الفيوم ** نقـــّـال كيله بمنديله

شومي رماك القدر بسهوم ** عقب التعلي نزلتي له

اصبح حليلك اخو نعوم ** ان راطنك خوب قولي له(7)

يامال نجمٍ حداه نجوم ** يدك ديلم ومن هي له

لا باس يا راعي المنظوم ** يا بادع القيل في جيله

والله لولا الحيا واللوم ** لا اصيح واقول يا هيـــله



_________________

1- فريجه : طقاقه بالزبير .. وفيه ناس قالو انها ربابة ابن لعبون .. لكن الاكيد انها طقاقه وقال القصيده هذي على لسانها بصورة انها يوم سمعت الحمام ينوح طرا لها الفن واخذت تتغنى بهالقصيده

2- تقول فريجه للحمام هالقصيده اللي انا اتغنى فيها هي قصيده مشهوره وقافها معلوم لكن يا حمام ما تدري قيلت بمنو ؟

3- تقول للطير انه ما يقدر يروح يشوف الحبيبه الي انقالت فيها هالقصيده وتستمر بغنائها للقصيده

4- يقصد بالدلال ابو هيله .. وارخصها بتزويجها لانسان وضيع بعد ما كان مغليها بزواجها السابق

5- يمدح فيها شيخ المنتفق وزوج هيله السابق .. حجا = ترس او درع .. المداريع = الرجال اصحاب الدروع المجهزين للحرب .. يدلل على قوته وعظمته

6- الجهاجيل = زينه تتدلى من الهودج

7- خوب = كلمة طيب باللهجه الفارسيه .. بهالبيت يحط من قدر زوجها الجديد ويتهمه انه مو عربي الاصل وانه فارسي

وسلامتكم[تم تعديل الموضوع من قبل المدهر بتاريخ 09-04-2001 الساعة 11:04 PM]

المدهر

بيض الله وجهك على ايراد هذه القصيده

للشاعر العلم محمد بن لعبون الوايلي

يهمني ان اذكرك بأن فريجه هي ربابته وانا متأكد

لأني قرأت لبن لعبون أكثر من مطبوعه وكان على

علاقه وثيقه بالربابه

الكلام في هذا الشاعر لاينقطع بل يدعوك للتمعن في اساوبه النادر في ذلك الحين حيث رسم خط مستقل

ومن قصائده المشهوره

ياعلي صحت بالصوت الرفيع
..

سقى صوب الحيا مزن تهاما

..

ماطرق قلب العنا يابن جلق

..

حي المنازل تحية عين

..

هذا على سبيل المثال وليس الحصر

اشكر مجهودك الوافر يالمدهر


مشهور....

السلام عليكم

اخوي العيافي

صبحك الله بكل خير

ووجهك ابيض دنيا واخره انشالله


بالنسبه لفريجه كثير اختلفوا عليها من النقاد والمؤرخين حسب ما قرأت لكنها بين انها ربابه .. او انها دفـّـافه ( طقاقه)

الاكيد انه استخدمها في كذا قصيده له استخدام رائع وعبقري سواء كانت ربابه او طقاقه

فالصوره اللي خلى فيها الربابه او الطقاقه تناجي الحمام صوره رائعه وعبقريه


اشوف تطرب بنوحك دوم ** وتقول واحب قلبي له

قصيدةٍ قافها معلوم ** بالله يالورق من هي له

يالورق وش لك بطرق اللوم ** وفنون ذا الغي وش هي له

ان كان صيدك تريد النوم ** ما فيه يالورق من حيله


لك الشكر وانشاء الله اني اذكر لابن لعبون اكثر من قصيده في هالمنتدى



تقبل تحياتي

ياسلام على الاختيار يالمدهر


وفريجه هي الربابه

لك الحب ولك الاحترام المدهر

ولاتبخل علينا في بن لعبون وغير بن لعبون

حوران

اهلا وسهلا بهالطله

مساك الله بالخير وشكرا على الاطلاع

وابشر يالغالي باللي يسر خاطرك


لك تحياتي وتقديري