شاعرة نجد(ام لافي)

هذة شاعره من نجد وليعذرني المنتدى بعدم ذكر الاسم ..حيث ان لها الكثير من القصائد ..وهي شاعره تستحق الاشاده ..وهذا الذي شجعني ان انشر بعض من قصائدها بعد الموافقه من ابنها حيث ان الشاعر او الشاعره لابد ان يرحلوا ولكن القصائد لاترحل ستظل موجودة وان القصيدة لابد ان يذكر من قائلها كي لا يستغلها البعض وينسبها له .....
وقد قالت هذه القصيد بعد ان وصل علم لها ان ابنها واخيها حصل لهم حادث سيارة وتوفى ابنها في الحادث ..


وونتي ونت ثلاثة عشر ذيب........................ذيب الخلا والنشر ماطالعنه

ذيب(ن) يجر عواه في تالي الليل ..................والصبح قرب والضواري حدنه

والعين تجزي ماتبي طاري النوم ..................مثل الفطيم الي فطم واستجنه

ولا يتيم(ن) ماتت امه وعاجوه...................والطفل عقب امه فقد كل ظنه

و لا قريص حنيش بالعرش داسوه..................والسم سار ويزعج الصوت ونه

ولا غريب(ن) بازرق الموج قطوه................حارت عيونه والدموع اغرقنه

ولا طريح فراش في البيت صادوه................. صكو عليه اللي تمس العنه

ولا خفير السجن بالحق ساقوه ...................وعيون خصمه بالفشق ينطرنه

ولا هنوف(ن)بالردى غصب داسوه...............شالت صوابه والصدر جر ونه

ولا خلوج النوق شدو وخلوه .....................على ولدها تزعج الصوت حنه

ولا كسير الساق والعظم شدوه...................تسهر عيونه والصدر جر ونه

على اثنين عند قلبي عزيزين....................والعمر منهم مقرش(ن) تقل شنه

تنعى ولدها مع اخو(ن)مخليه..................والقلب خف وغبنهم يصفقنه

يالله ياللي كل من ضاق نادوك ................تعوض قلب (ن) مزرته المظنه

يالله ياللي كل من ضاق نادوك ................تفرج لقلب(ن)كل هم(ن)يمله

لانامت الاطفال مانمرح الليل ................من خوف يصحا الطفل من كل عنه

وقدامهم ماكن في خاطري لون ...............واللي بقلبي جعل ربي يحله

.........................
فليعذرني الاخوان حيث ان القصيده قديمه والخط غير واضح وهذا الذي استطعت ان اوضحه بعد المراجعه مع ابن الشاعره والذي عنده ملاحظه من الاخوة فليتفضل وله مني كل الشكر والاحترام..


___________

اخوكم بوعرب

سعود العازمي لاهنت على المشــاركه ,وتسلم على ذا القصيده الجميله وفي انتظار الجديد

اخوك: المري

اخي العزيز المري

اشكرك مرة اخرى


لاطلاعك على هذه القصيده



ولك منى كل الترحيب


لمرورك



ولاهنت يالمري



اخوك بوعرب

سعود بيض الله وجهك



نادره وإختيارك موفق



الله يحفظك